2008/11/21

Bilgune feministak aurtengo azaroak 25eko diskurtsoa eta mobilizazioak aurkeztu ditu.

Aurten, oraindik bukatu ez den urte honetan, dagoeneko 5 emakume erail, ehunka eraso zein bortxaketa eta emakume desagertu bat izan dira. Argazki hau zoritxarrez urteak pasa ahala errepikatzen joan zaigun irudi bat da, inork beronen aurrean taxuzko erabakirik ez duela hartzen ikusten jarraitzen dugun bitartean.

Nazkatuak gaude indarkeria kasuak jazoera isolatu bezala tratatzeaz.
Nazkatuak gaude gure askatasuna mugatzen duten jarrerak egunero jasan beharraz.
Nazkatuak gaude instituzioek biktima soilak bagina bezala tratatzeaz.
Nazkatuak gaude agintariek dituzten erantzukizun politikoak ez betetzeaz.
Nazkatuak gaude komunikabideek indarkeria morboa bultzatzeko erabiltzeaz.

Errealitateak marrazten digun argazki krudel honen aurrean pazientzia bukatzen ari zaigu emakumeoi. Iada ezin dugu zain egon nahi ea gu salbatzera noiz etorriko, ezin dugu gure segurtasuna eta bizitza beste batzuengan delegatu.
Guregandik abiatuta egin nahi diogu aurre indarkeriari; emakume aske eta autonomo bezala formatuz, gure buruarengan dugun ziurtasuna handitu eta gaitasunetan sinestuz. Geure etorkizuna, gure gorputza eta bizitzen jabe izatea nahi dugu. Horregatik, autodefentsa feminista garatzeko deia luzatu nahi dugu.
Autodefentsa feminista autogestiotik eta antolaketaren aldeko apustua eginez ulertzen dugu: Emakumeok emakume izateagatik erasotuak bagara defenda gaitezen. Arazo sozial honi aurre egiteko beharrezkoa da emakumeok antolatzea, gure artean babestea, taldean eztabaidatzea eta espazio komunak eraikitzea. Bakoitzak bere esperientziatik eta jarduteko eratik, denon artean aurre egin diezaiogun egunero itotzen gaituen indarkeriari, bat egin dezagun pairatzen dugun zapalkuntzarekin amaitzeko. Erabil ditzagun gure gaitasun guztiak emakume bat gehiagok indarkeriarik jasan beharrik izan ez dezan, berak bizi izan duena guztioi egiten baitigute.
Azaroak 25 honetan bete ditzagun kaleak aldarri garbi ozen batekin, bat gehiago pasatzen ez dugula utziko esatera irten gaitezen. Kontzentrazio, manifestazio eta bestelako ekimenetan parte hartuz has gaitezen emakume guztion artean gure etorkizunean zer nolako harremanak garatu nahi ditugun erabakitzen. Emakumeok! Apur dezagun sistema patriarkala!
NAZKATUAK GAUDE! EMAKUMEOK AUTODEFENTSA!

EMAKUMEON KONTRAKO INDARKERIAREN AURKAKO NAZIOARTEKO EGUNAren harira egingo diren mobilizazioak:

Azaroak 25
BILBO	19’30	Arriagan	Koordinadorak deituta
ALGORTA		Martxa Algortatik Areetara	Bilgune feminista eta Emakume Gazteen Asanbladak antolatuta
DURANGO	20’00	Manifestazioa Andra Maritik	Emakume Plataformak deituta
ZORNOTZA	19’30	Kontzentrazioa Erreferendum Plazan	Emakume Plataformak deituta
DONOSTIA	19’30	Kontzentrazioa Bulebarrean	Donostiako Koordinadora Feministak deituta
ORERETA	19’30	Kontzentrazioa Niessenen	Plataformak deituta
ZARAUTZ	19’30	Kontzentrazioa Udaletxe aurrean	Sorginak eta Bilgune feministak deituta
ARRASATE	19’30	Kontzentrazioa Plazan Emakume	Plataformak deituta
TOLOSA	20’00	Kontzentrazioa Trianguloan	Bilgune feminisitak deituta.
AZPEITIA	19’30	Kontzentrazioa Herriko Plazan	Bilgune feminisitak deituta.
IRUN		Kontzentrazioa	Bilgune feminisitak deituta.
GAZTEIZ	20’00	Birjin Zurian	Plataformak deituta.
IRUÑA	20’00	Manifestazioa Gaztelu Plazatik	Indarkeriaren Kontrako Plataformak deituta
LIZARRA	20’00	Baja Navarran	Koordinadora Feministak deituta
ALTSASU	19’00	Plazan konzentrazioa	Koordinadora Feministak deituta
ETXARRI	20’00	Plazan kontzentrazioa	Bilgune feministak deituta
BAIONA	18’00	Herriko Etxean	Bortizkeriaren kontrako Taldeak deituta

<< itzuli